Tilbakehaldt etterburd

Kinkig: Det er vanskeleg å gje råd om rett behandling av etterburd som ikkje vil ut, men fleire alternative behandlingar er tilgjengelege. Foto: Rasmus Lang-Ree


Du kan lukte det og sjå det, men kva kan du gjere med det? Behandlinga er omstridt, men om kyra ikkje klarer å kvitte seg med etterburden, kan ho bli sjuk.


Hildegunn Mugås, dyrlege ved Hestavangen Dyreklinikk på Voss, og sauebonde


Ret.sec, tilbakehaldt etterburd, «klåren», eller «greier som heng» - alt betyr det same. På latin heiter det retentio secundinarium, derfor forkortinga ret.sec. At kyra skal kvitte seg med etterburden er på eit vis tredje og siste del av fødselen. Normalt sett kjem «greiene» kort tid etter kalven. Går det meir enn 12-24 timar, er det sjeldan dei kjem spontant. I følgje litteraturen førekjem tilbakehaldt etterburd i kring fire prosent av fødslane. Faktorar som er viktige for normal løysing av etterburden er tida ut i drektigheita. Morkara, placenta, modnast utover i drektigheitstida. Dette er ting som skjer på cellenivå. I tillegg må det vere balanse i hormonane som styrer drektigheit og etter kvart fødsel. Under og i etterkant av sjølve fødselen vil rier/ samantrekningar i børen gjere at etterburden fysisk vert avstøytt.