Ein pangstart for kalven

Hygiene og godt stell: Ein nyfødt og ung kalv kan nesten samanliknast med ein nyfødt baby. Tenk hygiene og godt stell heile vegen for å få ein sunn og frisk kalv. Foto: istock.


Den innsatsen du brukar på å gi kalven ein god start, får du att i høgare mjølkeyting i første og andre laktasjon.


Reidun Fattnes, dyrlege i Førde i Sunnfjord.


Kvart år blir det født mange kalvar og i dei fleste tilfella går fødselen problemfritt. Har fødselen vore tøff og kalven er svak er det viktig å leggja ekstra innsats i stell. Legg kalven på eit mjukt, reint og tørt underlag, helst med ei varmelampe. Dette for å få opp kroppstemperaturen. I tillegg bør du leggja ned sonde og gi minst to til tre liter råmjølk. Svake kalvar har som regel dårleg sugerefleks, derfor er sonde viktig. Viss de ikkje har lagd ned sonde før, så spør dyrlegen dykkar om vedkommande kan visa korleis de gjer det. Med denne ekstrainnsatsen kan du lukkast i å få ein kalv som kjem seg raskt på føtene og som overlever.