Borna med: Både folk og dyr skal trivast og ha det bra på garden. Øyvind Berge har prøvd ulike jobbar, men trivst aller best som bonde. Neste vår startar bygging av lausdriftsfjøs.

Skal bygge på Berge

Sterk vilje og grundig planlegging trengst for å lukkast med mjølkeproduksjon i bratte vestlandsbakkar. Øyvind Berge er villig til å satse, og er glad for å ha foreldra med på laget.


Anne Rivenes, frilansjournalist


Mange små teigar i bratte bakkar. Frå naturen si side er det langt frå opplagt at ein kan leve av mjølkeproduksjon i Vestbygda på Voss. Men så har du bønder som Olaug Soldal og Torleiv Berge, og sonen Øyvind, med pågangsmot og vilje til å byggje opp drifta, steg for steg.


– Me byrja å planleggje nytt fjøs for fem-seks år sidan, men me har kvidd oss for å gå i gang att med ei slik storsatsing. Difor blir det Øyvind som har overteke, som kjem til å gjennomføre byggjeplanane, seier Torleiv Berge, som har drive garden i 42 år saman med kona Olaug.


No blir dei kårfolk og aktive støttespelarar.