Omstart med varme frå djupet

Nøgd: Kjell Hodne er mildt sagt nøgd med varmeanlegget i kyllinghuset. I starten nytta han gass for å sikra temperaturen dei første dagane etter at kyllingane var komen. No kjenner han anlegget betre, og klarer å utnytta det utan å ty til gass.


Tidlegare minkbonde Kjell Hodne trivst som kyllingprodusent. No har han eit flunkande nytt kyllinghus med bergvarme som varmekjelde.


Jane Brit Sande


Førre gong Bondevennen besøkte Kjell Hodne på Klepp på Jæren i 2020, var han i gang med siste pelsing. Etter fleire tiår med mink som hovudnæring, var det slutt. Både pelsforbodet og helsa sette den siste spikaren i kista for produksjonen. Kjell måtte seie opp fem mann, som hadde vore med i pelsproduksjonen i ei årrekkje.


– Dei er alle i nytt arbeid no. Éin fekk vere med vidare her på garden; han som er best med dyra, seier bonden.


Med omstillingsmidlar i boks, vart det nytt kyllinghus på garden.