Hjelpe med avl: Merethe Mørk (t.v.) har vore Anita Garheim Stangeland sin mentor gjennom året. Anita ville ha ein mentor som kunne hjelpe ho med å komma i gang med avlsarbeidet på garden.

Ein mentor på laget

Når kvardagen er ny, ansvaret stort og spørsmåla mange, er det godt med ein mentor på laget. Gjennom sitt første år som bonde, har Anita Garheim Stangeland fått rettleiing frå Merethe Mørk.


Jane Brit Sande


Anita Garheim Stangeland (25) tok over garden på Koldal i Eigersund i oktober i fjor. På garden er det ammeku-produksjon. Ho har 14 mordyr, alle er reinrasa angus. Då Anita høyrte om mentorordninga til Norsk Landbruksrådgiving (NLR) tenkte ho ‘kvifor ikkje?’


– Før eg tok over, hadde ikkje avlsarbeid vore prioritert her på garden. Eg trur fokus på avl berre blir viktigare i framtida, men eg kunne ikkje noko om det. Derfor ville eg ha ein mentor som kunne hjelpe meg med dette, seier ho.


Og her kjem Merethe Mørk inn i biletet. Også ho frå Eigersund. Merethe har lang fartstid som ammekubonde, og med avlsarbeid på angus.