Ei veke med klauvklipping

Sjekker alle: Alle føtene skal sjekkast når Atle tar runden med å klippe klauvene på sauene.


Sauene til Tonje og Atle Kloster er klipte og lyste. No står klauvene for tur. Det er Atle sitt ansvar. – Det går greitt når eg først er i gang, seier han.


Liv Kristin Sola


Det er den veka i året. Atle Kloster har sett av fem dagar til å klyppe klauvene på saueflokken. 171 dyr skal sjekkast og trimmast.


– Heilt greitt, seier han, og vipper ei av søyene over i nettingramma.


– I teorien skal dei ligge i ro. Som ei flue i eit edderkoppnett, seier bonden.

Systematisk sjekk av alle dyr

Men det er ikkje alle som ligg like djupt i nettet. Lamma kan vere ei utfordring, men Atle er svært nøgd med hjelpemiddelet sitt. Det gjer det mogleg å gjere jobben åleine. Berre bonden, saueflokken og musikken. Det trivst Atle godt med.


– Eg hugsar det som meir strevsamt i fjor. Då stressa eg nok meir for å bli ferdig. I år har eg akseptert at det tek den tida det gjer. Då er det greitt, seier han.


Alle dyra skal sjekkast. For det er ikkje lett å sjå korleis tilstanden på klauvene er utan å sjå dei under føtene. Systematisk jobbar Atle frå binge til binge og merkar dei dyra som er klipte.


– Tilstanden på klauvene varierer. Alt frå skikkelege heksenegler til dei som ikkje treng å trimmast i det heile, seier han.