Vårkål – auka utbreiing på Vestlandet?

Invadert: - Det er teikn til auka utbreiing av vårkål i eng og beite fleire stader på Vestlandet. Store førekomstar fører til tynnare grasdekke og lågt avlingsnivå. Foto: Olav Martin Synnes


Observasjonar tyder på at Vårkål aukar i utbreiing på delar av Vestlandet. Planten bør takast på alvor.


Olav Martin Synnes, NLR Vest


Vårkål blomstrar tidleg i april. Han har vore rekna som lite brysam, sidan han visnar og er lite synleg frå slutten av mai. Vårkål lagar tette matter, og fører til tynnare grasdekke og lågare avlingsnivå. Han bør difor takast på alvor.
Vårkål tilhøyrer soleifamilien, med store gule kronblad. Noko av det mest særmerkte ved planten, er at han blomstrar så tidleg, kring 1. april når våren kjem tidleg. Etter blomstring visnar han gradvis. Alt i slutten av mai kan han vere lite synleg.

Toler skugge

Vårkål trivast best i kyststrok. Han førekjem i hagar, langs hekkar og grøfter, i eng og beite, og i skog. Han er mest vanleg på våt jord, og svakt sur jord. Han toler godt skugge. I litteraturen er det nemnt at tidlege unge blad kan etast. Eldre blad i store mengder reknast som giftige.