Verda treng meir mat: …men å genredigera seg til høgare og betre avlingar tar meir tid enn me har. Foto: Istock / Axel Bueckert


BOKMELDING:

Bioteknologiprogrammet i landbruket – eit 40-års tilbakeblikk

Norsk genteknologi er ikkje eit felt for dei utolmodige.


Åsmund Bjørnstad



Ein seinhaustes føremiddag i 1986 heldt professor Harald Skjervold føredrag på Bryne, trur eg det var, om det store nye i husdyravlen, bioteknologi. Han vart introdusert – i den grad det trongst – av fylkesagronom Einar K. Time. (Eg fekk vera med for å seie nokre få ord om planteforedling.) Skjervold la ut om boka si, Genteknikk. Arv på en ny måte, om korleis vi kan finne gena og flytte utvalet frå ytre utsjånad til arvetypen. Han var blant sine eigne og krydra perspektiva med ord som «Og no ska dokker få hør no som vil ta nattesøvnen i frå dokk.»