Tar sjølvkritikk og kritiserer Mattilsynet

Tillit: Stoltheita over å vera svineprodusentar har dei framleis, sjølv om det har vore tilfelle siste året der Silje Kristin og Bjørn Ståle Bekkeheien har valt å ikkje fortelja kva dei driv med. No oppmodar dei til openheit og engasjement for å betra dyrevelferda og byggja opp tilliten hjå forbrukarane.


Dei tar Mattilsynet sin sluttrapport om manglande dyrevelferd i svinebesetningar i Rogaland på største alvor, men meiner sjauen kring tilsynsrunden har vist at Mattilsynet også må bli betre på deira jobb.


Sjur Håland


At ting ikkje har vore på stell blant svinebøndene i Rogaland, er Silje Kristin og Bjørn Ståle Bekkeheien klare på. Ripene i lakken er alvorlege.


– Utgangspunktet er eit godt renommé med verdas beste dyrehelse og dei strengaste velferdskrava. Dei stygge tilfella som er avslørt siste året med brot på dyrevelferda er heilt uakseptable.