Strategi er viktigare enn rase

Kva rase gir best økonomi?: Kva rase ein skal velja for å få best lønsemd må reknast på i kvart enkelt tilfelle. – Ressursane på garden og prisane på innsatsfaktorane er aldri like på to bruk, og rammevilkåra varierer mellom regionane, seier Lars Byberg Timpelen.


Har du ein bevisst avlsstrategi eller flyt du med straumen? – Ein god strategi for utvikling av buskapen gir markant betre inntening, uavhengig av rase, seier avlsrådgivar Lars Byberg Timpelen.


Liv Kristin Sola


NRF, jersey, holstein, flekkfe eller brunfe, har du tenkt på kva for rase passer best på ditt bruk? Eller driv du av gammal vane og overlét til inseminøren å finna oksar?
Spørsmåla kjem frå Lars Byberg Timpelen i Tine. Etter over ti år som avlsrådgivar har han sett – og ikkje minst høyrt, det meste. Mange meiner mykje om kva som skal til for å lukkast, eller snarare kvifor dei ikkje lukkast, i å nå måla for buskapen sin. Er det fjøset, fôret, rådgivaren eller inseminøren sin feil at kua ikkje mjølkar? Eller har du satsa på feil rase?