Mangfald vil sikra mold og mat

– Dagens jordbruk er diverre jordforbruk. Det kan gje store konsekvensar for mattryggleik, klima og miljø, åtvarar Silja Valand, rådgjevar i NLR Viken. På Voss rustar bøndene seg til klimakamp, med bygging av matjord som fremste verktøy.


Anne Rivenes, 
frilansjournalist Voss


God jordstruktur gjev betre økonomi og gjer drifta meir rusta for klimaendringar. Det var vinklinga på «Fagmøte om jordhelse» på Voss 2. april, eit samarbeid mellom Voss kommune, Landbrukets Økoløft og Norsk Landbruksrådgjeving Vest. Eit av klimatiltaka Voss kommune har valgt, er regenerativt landbruk.


– God levande jord er grunnlaget for eit bærekraftig landbruk. Og Voss har mange flinke bønder som er i stand til å ta til seg ny kunnskap, sa Kari Mostad i Voss kommune si næringsavdeling.

Mister mold og karbon

– Einsidig åkerdrift gjer at mykje mold går tapt. No er me på grensa. Jorda er mindre robust, og taklar ikkje påkjenningar som streng turke eller mykje nedbør. Matjord-problematikken samanfell med klimautfordringane, så å retta innsatsen her er vinn-vinn. Levande matjord vil gje sikrare matproduksjon, seier Silja Valand, rådgjevar i NLR Viken.


NIBIO slår fast at norsk kornproduksjon har ti prosent lågare avling enn sitt potensial grunna redusert moldinnhald. Ein naturleg stad å byrja, når ein samstundes veit at Noreg har som mål å auke eigen matproduksjon med 20 prosent.