Leitar djupt etter jorda sine kvalitetar

Stadleg vurdering: Andreas Mickelson og Elling Mjaavatten har lang røynsle i å vurdere jordkvalitet, basert på å sjå og kjenne på jorda. Alle vurderingar vert gjort på staden, og data vert lagra digitalt.


For første gong vert jordsmonnet på Vestlandet kartlagt. Det er viktig kunnskap med tanke på jordvern og klimatilpassing. – På eit vis er dette ei jordvern-kartlegging, seier NIBIOs folk på åkeren.


Anne Rivenes, frilansjournalist


Ei gruppe jordkartleggjarar frå Nibio jobbar seg gjennom eng og åker i Voss, den første jordbrukskommunen i Vestland fylke som får jordsmonnet kartlagt. Overalt vert det laga stikk i jorda, for å sjå og kjenne på kva som ligg gøymt under torva.


– Så djupt har eg ikkje kome før, i alle fall ikkje i år, seier feltansvarleg Elling Mjaavatten, litt andpusten etter å ha skrudd jordboret ein meter ned i bakken.


Han dreg opp ei god handfull jord, litt gråare i farge enn jorda på halvmeters djupn.


– Den første halvmeteren er me nøye på, og det er spesielt viktig å bedømme tekstur i topplaget. Lenger ned er det meir grus og stein. Etter 60 centimeter byrjar ein å sjå endringar, til dømes rustflekker som tyder på dårlegare drenering når ein nærmar seg fjell, seier Mjaavatten.