Kva skal framtidskua levera på?

X-faktor for haldbarheit: Geno er på leit etter ein ukjent faktor som gjer at enkelte kyr leverer år etter år. Foto: Ståle Hustoft


Mjølk, kjøt eller klima? NRF-kua har mykje å leve opp til om dagen. – Det eine utelukkar ikkje det andre, seier Hans Storlien, marknadssjef i Geno.


Liv Kristin Sola


NRF-kua er omtykt og akta, men også utskjelt og omdiskutert. I seinare tid er ho løfta fram som klimakua, til applaus frå somme og irritasjon hjå andre. Kan hende er det tid for næringa å diskutere kva NRF-ku vi skal ha i framtida.

Tenk smart

Skal NRF fortsatt vere kombikua som produserer bra med mjølk, men som også slaktar seg godt den dagen det er slutt? Eller er det på tide å reindyrke oksar som er spesialistar på mjølk, som produserer døtrer med gode mjølkeeigenskapar, sjølv om det kostar litt kjøtvekt.


– Det eine utelukkar ikkje det andre, seier Hans Storlien, marknadssjef i Geno.


– Same korleis vi vrir og vender på dette, vil ein stor del av storfekjøtet kome frå mjølkeproduksjonen, også i framtida. Det er rett, ikkje minst med tanke på klima. Då må vi ha litt musklar på desse dyra våre, held han fram. At Geno også har kjøt som ein del av avlsmålet, meiner han ikkje er til hinder for bønder som vil optimalisere drifta og avle fram kyr med gode mjølkeeigenskapar, med NRF som base.