Kuutstilling Jærmessa 2016

Tvillingane Maria og Mikkel (12) mønstra kvar si tvillingku i klassa for 1. kalvs NRF på Jærmessa i år.
Programmet er klart. Siste finpuss på kyrne står att.
Med glimt i auge og kjappe replikkar, losar Eirik Flåten publikum og mønstrarar gjennom dagen.
Stasband til klassevinnarar, til Gullkua og til Miss Jæren, og til vinnaren av ungdomsmønstringa.
I tillegg til stasband, får vinnarane smykke seg med ei flott ku-bjølle.
Maria og 1.kalvskua 749 på Jærmessa i år. Dei vann ein knapp siger over Mikkel og 750. Kua til Maria fekk 9,5 poeng for kropp og bein og 4 for jur.
Bondelaget stiller velvillig opp til dugnad og gjer ein viktig jobb under kuutstillinga.
Profilering set ein ekstra spiss på utstillinga.
Fottøy må stå i stil.
Mikkel og Miss Jæren, fekk gratulasjonar frå leiar i Rogaland Bondelag, Ola Andreas Byrkjedal.
Av dei 6 deltakarane i klassa for eldre NRF, vart ku nr 653 frå Skretting Ku, kåra til vinnar. Ho fekk 9 poeng på kropp og bein, og 4,5 på jur. Kua har hatt 5 kalvar. Far er 28004 R David. Morfar er 28006 K Lens.
Etter mange rundar inn i ringen, var både kyrne og resten av familien sliten men nøgde då kuutstillinga var slutt for i år.
1. kalvskua Zelda til Bjarte Njå, er klar for ringen.
Vaskekroken vert flittig nytta for å gjera dyra klar.
Far og son Garborg er klar og tek seg ein kopp kaffe før dei skal i ringen.
Det er forventning og spenning i lufta, blant dei som skal mønstra. Vil kua nå opp i konkurranse med alle dei andre? Vil ho oppføra seg, eller "skjemma ut" både seg og eigaren?
Fille og vatn er det som duger.
Ein erfaren mønstrar og kviga hans, får beundrande blikk frå ein ung tilskodar.
Magnus Aarsland tek siste finpussen. Han skal mønstre kviga i ungdomsklassen.
Det er i grunnen det same kor ein er, berre ein får mat.
Familien Aarsland er erfarne i mønstringssamanheng. Dei deltek med kyr og kalvar, både på Jærmessa og på Dyrsku'n i Seljord.
NRF-kyr på rekke og rad.
Siste finpussen er unnagjort.
Dei var tre som konkurrerte i ungdomsmønstringa, Magnus Aarsland (15), Emma Oline Mellemstrand (16) og Marie Hognestad Brådli (20).
Sigeren i mønstringsklassa smaka godt for Marie H. Brådli. 2015 var eit godt år for mønstraren Marie, men ho mangla sigeren i ungdomsmønstringa på Jærmessa.
Dommar Tore Joa til høgre, og Asgeir Pollestad, fungerande dommarsekretær, var skjerpa under ustillinga.
Det er stil over både dyr og mønstrar. Ei lærgrime tek seg godt ut i ringen. Med eit godt tak med venstrehanda, og ei ku følgjer etter med lyfta hovud, fungerer det meste etter planen.
I jerseyklassa var det 5 påmelde kyr, der 2 av dei var kryssingar.
Flotte dyr ga høge poengsummar og 4 (av 5) 1.premiar. Poengsum for kropp og bein låg frå 8 til 9, og for jur, frå 3,5 til 4,5.
Munter tone mellom mønstrarane, Magnus og Kjersti, med kvar si Jerseyku.
Veteranen Malena til Kåre Sigurd Undheim og mønstrar Sindre Årsvoll, gjekk til slutt heilt til topps i Jerseyklassa. Malena er etter 27010 Q Hov og morfar 136 Q Handix. Ho fekk 9 poeng for kropp og bein, og 4 for jur.
1.kalvskua Zelda til Bjarte Njå, fekk dagens høgaste poengsum for jur, 5 poeng og full pott. På kropp og bein fekk ho 9,5 poeng. Zelda er etter 30077 Klassic Big Time-ET, med morfar 33148 Ocean View.
- Ei jamn og sterk gruppe, kommenterte dommar Svein Egil Skartveit, og delte ut 1.premiet til 5 av dei 6 kyrne som deltok i holsteinklassa.
Kua Ukullele Avalon, frå He-Rosnes, vann klassa for holstein. Ukullele har hatt 1 kalv, og fekk 9,5 for kropp og bein, og 4,5 for jur. Far er 33323 Farnear-TBR Altaavalon-ET, morfar er 33224 Southerland Lewis.
I klassa for dei mest haldbare kyrne, vart det ein klar siger til Jerseykua Malena, frå buskapen til Kåre Sigurd Undheim. Ho er 10 år gammal og har hatt 8 kalvar. og utmerka seg spesielt på mjølk og jurhelse. Malena vart kåra til årets GULLKU 2016.
Så var det slutt for denne gong.

Familien Skretting konkurrerte mest med seg sjølv under kuutstillinga på Jærmessa.

Liv Kristin Sola

Siste helga i august var det igjen fest i utstillingsteltet på Jærmessa på Varhaug, med ungdomsmønstring og kuutstilling på laurdagen, og kalvemønstring på søndagen.

Teltet vert fylt opp av kyr og bønder og ei litt spent stemning brer seg. Kyrne vert vaska etter transporten, og får den siste finpussen. Nystrokne skjorter heng langs teltduken. Dommarane er skjerpa. Stasband, premiar og staslege kubjøller ligg og ventar på dei finaste kyrne.

Ungdomsmønstring

Først ut er ungdommane. I mønstringsklassen er det korleis mønstraren handterer kua i ringen, som avgjer. Om dei leier og stiller kua rett, og har eit godt auge til dommaren. Dei tre mønstrarene fekk ingenting gratis frå kyrne denne dagen. Den som klarte utfordringa best, var Marie H. Brådli. Ein etterlengta siger for Marie. Ho har mønstra ku og kalv sidan ho var lita, men har aldri vunne ungdomsmønstringa på Jærmessa.

Kuutstilling

Kyrne var delt inn i ein klasse for Jersey, ein for Holstein og to for NRF (1.kalvskyr og eldre).

Miss Jæren

Inn i ringen kjem det seks kyr. Den beste 1. kalvskua og den beste eldre frå kvar rase. Dommarane frå raselaga vurdera og set opp si individuelle rekkefølgje. Dei får ikkje stemma på eigen rase. Med to 1-tal, både frå Holstein og Jersey, var det ingen tvil. 653 frå Skretting Ku vart suveren vinnar av tittelen Miss Jæren.

Gullkua

Ei viktig markering er å kåra den mest haldbare kua, ein siger som gir tittelen Årets Gullku. Fire kyr var påmeld i klassa. Til slutt var det Jerseykua Malena frå Kåre Sigurd Undheim, som stod att med høgast poengsum. Med åtte kalvar, høg avdrått og lågt celletal, vart ho umogleg å slå for dei yngre deltakarane i klassa. Malena er etter 27010 Q Hov og morfar er 136 Q Handix. Ho har gjennomsnittleg avdrått på 11.277 kg EKM. Eit imponerande celletal, med 77 som det høgaste geometriske middel gjennom ein laktasjon, snitt på 51.

Del på Facebook

Stikkord denne saka: Avl, husdyrutstilling, Mjølkeku