Hjortebestanden må ned

Magne Norddal tapar 25 prosent av grasavlinga til hjorten. I tillegg kjem kostnadar med hyppigare attlegg, gjerding og drift av meir areal. - Vi treng ein nasjonal plan for kor vi vil med hjorteviltet, seier mjølkebonden.


Liv Kristin Sola


Å sjå tretti hjort som beitar på bøen er ikkje unormalt hjå Magne Norddal i Fjaler i Sunnfjord. For hjorten er ikkje annleis enn folk. Han vel frå øvste hylle og forsyner seg godt av det frodige graset på ei godt gjødsla eng. Og timotei er favoritten.


25 prosent av avlinga går tapt til hjorten. Det viser registreringar over tre år som NLR Vest nyleg har avslutta. Arve Arstein ved landbruksrådgivinga har talfesta kostnaden på avlingstapet ved å erstatte tapt grovfôravling med kraftfôr.