Har venta på tilgode-pengar i fire år

Ventar på utbetaling: Medlemmar i samdrifter kan etter søknad få ut medlemskapitalen i Nortura straks etter oppløysing av samdrifta. Tore Kydland selde garden for fire år sidan og ventar framleis på at pengane han har tilgode skal bli utbetalt.


Tore Kydland frå Bjerkreim slutta med husdyr i 2016 og selde garden året etter. Men han har framleis pengar tilgode hjå Nortura som han ikkje får ta ut.


Sjur Håland


Ei kontoutskrift frå Nortura syner at Kydland har nær 35.000 kroner tilgode. Men pengane får han ikkje ut. Nå ber han Bondevennen om hjelp.


– Det toppa seg då eg høyrde om at samdrifter som vart oppløyste fekk ut sine beløp frå tilsvarande konti, seier han.


Kydland presiserer at beløpet ikkje handlar om andelsinnskotet på 12.000 kroner, som eigarane skaut inn etter at ordninga vart innført i 2010. Dei pengane fekk han utbetalt sommaren 2017.
Etter fleire rundar med Nortura, fekk han ut ein oversikt som stadfestar at det har bygd seg opp eit beløp på nær 35.000 kroner i åra mellom 2011-2017.


– Eg har problem med å skjøna kva dette er, og finn det merkeleg at det ikkje skal vera råd å få ut pengane, seier han.