Fryktar katastrofe for små mjølkebruk

Dyrare: Byggebransjen varslar om prisauke på tre, stål og betong. Det kan stikka kjeppar i hjula hos bønder som har planlagt å byggja nytt. Foto: Istock


– Ein kraftig kostnadsauke i kombinasjon med eit dårleg jordbruksoppgjer og altfor lite midlar til investering. Det er katastrofalt for utbyggingsbruka, åtvarar Jo Helge Sunde i Tine.


Liv Kristin Sola


– Me kan ikkje halde fram med å pakke inn sanninga. Mindre utbyggingsbruk vil ikkje klare ein eventuell kostnadsauke på 25-30 prosent, seier Jo Helge Sunde, Tinerådgivar og leiar for Storfeprosjektet i Vestland.


Han jobbar dagleg med å motivere bønder til å planlegge omlegging frå bås til lausdrift på Vestlandet. Så langt har investeringslysten vore god. Allereie i januar kom meldinga om rekordstor søknadsbunke hjå Innovasjon Norge. Men for mange av dei som kom gjennom nålauget i år, er gleda snudd til uro. Byggebransjen varslar om prisauke på råvarer som tre, stål og delvis også betong.


– Eg fryktar me vil sjå prosjekt som ikkje kan realiserast på grunn av den varsla prisauken, seier Sunde.


Med krav til båsfjøs frå 2024 er det mange som ganske snart må ta eit val.

Krev solid eigenkapital

– Me er i kontakt med rundt seksti bønder som ønsker hjelp til å vurdere alternativa. Dette er bønder i gruppa som politikarane seier dei vil prioritere. Eg er redd mange av dei vil bli skuffa, seier Sunde.