Finnøy: Fulldyrka blei overflatedyrka

Frå dyrka til overflatedyrka: Under bakken ligg gamle steinveiter. Jorda har blitt nytta til både korn-, potet- og grønsaksdyrking i generasjonar. – Det er meiningslaust at denne jorda no er definert som overflatedyrka, seier Peder Bergøy.


Halvparten av dyrkajorda på garden har, utan bonden var klar over det, blitt endra frå fulldyrka til overflatedyrka av styresmaktene. Dermed fekk Peder Bergøy redusert avlingsskadeerstatninga med kring to tredjedelar.


Sjur Håland


– No lurer eg og dei andre bøndene på Finnøy på kva motivet for dette kan vera, seier Bergøy.


Finnøy-bonden tar spada med ut på eit jorde, kring 100 meter frå tunet.


– Her har det blitt dyrka mat i fleire generasjonar, seier han, set spada i jorda og vippar opp ei vintergrå grastuve med svart matjord under.

Dyrka med dyrkingsbidrag

Enga Bergøy står på er drenert med gamle steinveiter og har blitt nytta til både korn-, potet- og grønsaksdyrking i generasjonar.


– Her pløyer eg enga ved fornying, slik eg gjer elles på garden, forklarer han.


Den fylitthaldige jorda gir gode avlingar, men er ikkje lenger rekna som fulldyrka jord. Det skjønar Bergøy lite av.