Fekk Gjensidige til å snu

Fekk dekt saneringa likevel: Tommy Horpestad stussa då forsikringsselskapet ikkje ville betala for saneringa etter ringorm-utbrotet. Med hjelp frå Bondelaget fekk han Gjensidige til å snu. Foto: Sjur Håland


Tommy Horpestad reagerte på at forsikringa hans ikkje dekte saneringskostnadane etter ringorm-smitte i fjøset. Med draghjelp frå Bondelaget fekk han Gjensidige til å snu.


Jane Brit Sande


I juli 2020 oppdaga Live Horpestad, kona til bonde Tommy Horpestad, eit karakteristisk utslett på nokre av kyrne. Veterinær vart kontakta, og allereie neste dag var prøvane postlagde.


– Det gjekk jo som me frykta: fire av kring 100 dyr hadde ringorm. Framleis veit me ikkje korleis me fekk smitten inn i fjøset, seier Horpestad til Bondevennen.


Garden ligg på Horpestad i Klepp kommune på Jæren, der husdyrbruka ligg tett.


– Eg var streng med smitteslusa før, og er berre blitt strengare etter me fekk smitten. Me kjem til å gjere tiltak for å halde folk ute av fjøset, seier han.