Etablerer eigedomsmeklar på Jæren

Landbruksmekling: Jan Egil Fornes og nyetablerte Landkreditt Eiendom hiv seg inn i eigedomsmeklarbransjen på Sørvestlandet med kontor i Rogaland Landbrukspark på Klepp.


Landkreditt Eiendom trur det kjem fleire landbrukseigedommar for sal framover. Nå har selskapet etablert seg med eigen meklar i matfatet på Jæren.


Sjur Håland


Jurist og eigedomsmeklar Jan Egil Fornes har utsikt over store delar av Jæren frå kontoret sitt i Rogaland Landbrukspark på Særheim i Klepp. Fornes har ansvaret for å få det nyoppretta distriktskontoret til Landkreditt Eiendom opp og gå.

Kjøpte Koppang

Landkreditt er mest kjent for bank- og forsikringstilbod retta særleg mot landbruket. Selskapet kjøpte Koppang Landbruks- og næringsmekling i februar i fjor, og tok dermed også steget inn i eigedomsmeklingsbransjen.


– Med etablering her i Sør-Vest no, eitt kontor i Trøndelag og eitt kontor i Vestfold i løpet av sommaren, er me godt i gang med å etablera oss fleire stadar i landet, seier meklaren.


Fornes er frå Aukra. Han har brei erfaring innan eigedomsmekling. I tillegg har han vore banksjef ein periode. No er han busett i Sandnes og skal i hovudsak spesialisere seg på sal av landbrukseigedommar. Distriktet omfattar Agder, Rogaland og søre delen av Vestland.


– Me er fleksible og har slikt sett ingen faste grenser for kor me opererer, seier han.