Nok med seks år: No startar jakta på Marit Epletveit sin etterfølgjar.
Leiar i Rogaland Bondelag, Marit Epletveit tar ikkje attval.
Bothild Å. Nordsletten
Epletveit slapp overraskande katta ut or sekken under leiarmøtet i Rogaland Bondelag fredag. Etter seks år i førarsetet, tar ho ikkje attval. Epletveit vart vald første gong i 2017.
– Kva er grunnen til avgjerda?
– Familieårsaker. Eg får ikkje kabalen til å og i hop heime, seier Epletveit til Bondevennen.
I tillegg til leiarvervet er ho mjølkebonde med fire barn i Gjesdal.
I talen til lokallagsleiarane forsikra ho om at leiarvervet er meiningsfylt og gildt.
– Eg har lært utruleg mykje. Fått lov til å vera med der det skjer, eg har møtt masse menneske eg aldri trudde eg skulle få møta.
– Etter seks år som fylkesleiar, korleis kjennest det å gi seg?
– Alt til si tid, svarar Epletveit.
Valnemnda, leia av Laurits Stokkeland, skal no i gang med å finna Epletveit sin etterfølgjar som skal veljast under årsmøtet i mars.
Det bør vera fleire å velja blant, ifølgje Epletveit.
– Det er fleire gode. Hugs, då eg vart vald, hadde valkomiteen heile åtte personar inne til intervju.
