Avl på høgste nivå

Viktige stikkord: Når Lars Byberg Timpelen går gjennom oksekatalogen blir det notert eigenskapar, pluss og minus i oksekatalogane.


Når ein ny oksekatalog er i postkassane, samlast bønder og inseminørar på Genoloftet for å diskutere utvalet, okse for okse.


Liv Kristin Sola


Bilane sig inn på parkeringsplassen utanfor Genoloftet på Særheim i Klepp. Tett i tett stiller dei seg ved sida av kvarandre for at alle skal få plass. Det er tid for det tradisjonelle Avlsmøtet på Genoloftet.
Dei to langborda fyller seg opp. Bøndene grip kaffikoppen og ein oksekatalog, og kjem i godt drøs. Rundt bordet sit gamle kjenningar, men også nye ansikt. Yngre. Somme kjem også to generasjonar frå garden.
I kveld er avlssjef i Geno, Håvard Tajet, på besøk. Han er godt førebudd. Ingen tek lett på å møte engasjerte jærbuar på heimebane.