Kontakt: Det er lett å få kontakt med sauene og oversikt over flokken, og så er det triveleg å jobbe med sau ute, meiner Jenny Johnsen og Sondre Syse.

Tek regien på eigen kvardag

Å ha sauene ute heile året er billegare enn å byggje fjøs, og enklare med fôring og lamming, meiner Jenny Johnsen og Sondre Syse i Ulvik. Å flytte flokken gjer dei med mobilen, og «fjøsstellet» føregår i det fri.


Anne Rivenes, frilansjournalist


Høgt oppe i lia med utsyn over Hardangerfjorden og idylliske Ulvik, ligg garden Ljono. Det er midtvinters, men ute vandrar sauene roleg rundt på beitet. Nokre står ved fôrkorga, andre beitar på gras og greiner, eller ligg i ly og hjortar og kviler.
I staden for å byggje fjøs har Jenny Wright Johnsen og Sondre Syse satsa på utefôring av saueflokken. Det er det mange gode grunnar til, meiner Jenny, med husdyrfagleg utdanning frå Ås.


– Det er første året med heile flokken ute. Me køyrde ein test i fjor, delte flokken i to, og hadde halvparten ute. Det fungerte svært bra, så i år er alle ute. Me ser at dei trivst og er friske, dei har god helse og god kondisjon, seier Jenny.