Kritisk til Nortura sitt Steinsland-kjøp

Kven skal høna koma frå? Er det greitt at Nortura kjøper seg inn i den eine av to leverandørar av livdyr til eggproduksjonen? Nei, meiner Gurine Seland og Odd Sele. Nortura seier på si side at oppkjøpet vil gjera det mogleg å utvikle norsk eggproduksjon for å møta framtidig konkurranse og nye krav til berekraftig produksjon. Foto: Jane Brit Sande.


– Nortura-oppkjøpet av aksjeposten i Steinsland kom som lyn frå klar himmel, seier Odd Sele. Han og kollega Gurine Seland reagerer på manglande informasjon frå Fagutvalg egg og frå tillitsvalde elles før pressemeldinga i etterkant av handelen.


Sjur Håland


Sist i januar vart det kjent at Nortura har kjøpt to tredjedelar av aksjene i familieverksemda Steinsland & Co. Den tradisjonsrike verksemda med base på Jæren har vore i drift sidan 1953. Verksemda klekker om lag 70 prosent av alle norske verpehøner i sitt rugeri. Drifta har ein årleg omsetnad på kring 50 millionar kroner og gir arbeid til 15 tilsette i til saman 11 årsverk. Nortura seier målet med oppkjøpet mellom anna handlar om å investera i teknologi som sorterer ut hanekyllingane tidleg i rugeprosessen når ein robust metode for dette er tilgjengeleg.