Forfangenheit hjå storfe

Ku med kronisk forfangenheit: Kul på ryggen og noko mager. Truleg har ho også ei kompliserande liding i klauva i venstre bakfot, som kan vera ein konsekvens av forfangenheit. Kua vart avliva av dyrevernmessige omsyn.


Forfangenheit er ei liding som kan ha ulike årsaker, men kan vera vanskeleg å oppdage. Tidleg behandling er avgjerande, difor er det viktig å følgje med på dyra.


Asle Bjørgaas
34 års klinisk praksis i Voss, no praktiserande veterinær i Vaksdal og Modalen med vaktsamarbeid med Voss.


Tradisjonelt sett har forfangenheit vore ein sjukdom som har råka hestar som har tilgang til store mengder kraftfôr, eller har beita på næringsrike beite. Då eg byrja i praksis for omlag 40 år sidan, hadde forfangenheit også vorte ei aktuell diagnose hjå storfe. Etter kvart er ein blitt merksam på at lidinga òg kan førekoma hjå sau.