På far sin arm: Fem år gamle Jenny blir gjerne med på beitetilsyn, men førebels er det tryggast på far sin arm.

Skotske kyr i jærsk høgland

På Matningsdal på Jæren beiter skotske kyr. Dei gjer nytte av skrinne beite der lynghei, myr og bergknaus pregar landskapet.


Jane Brit Sande


Utmarka på Matningsdal, aust i Hå kommune, hadde stått unytta i fleire tiår. Lenge hadde utmarksslått vore ein måte å nytta det karrige landskapet, men det var det slutt på.


– Det var for gale at 1600 mål med utmark ikkje vart nytta. Det ville eg gjere noko med. Eg måtte berre finne ut korleis, seier Ronny Matnisdal.


Den skotske storferasen Galloway freista, og i 2006 kom dei femten første dyra til gards. No har han totalt 70 dyr av rasen.


– Denne storferasen er ekstensiv, og kjend for å klara seg på skrinne beite, slik eg har her, seier Ronny, og ser utover området, der bergknaus, lynghei og myr dominerer.