Høygrabb: Den skinnegåande teleskopgrabben har ein nøkkelfunksjon i handteringa av høyet. Her hentar Vegard ferdig tørka høy i eine tørkebingen. Høyet blir lagt på matebordet som leverer høy til pressa.

Hekta på høy

Hardangerbonden Vegard Hjelmeland produserer årleg 150 tonn grønt og velluktande høy. Vegard meiner det er plass til fleire høyprodusentar. Også på Vestlandet.


Sjur Håland


Bonden registrerer at mykje høy blir frakta frå aust til vest. Betalingsviljen er god i området. Dei siste åra har Vegard selt høyet for kring fem kroner kiloen pluss moms.
For å lukkast med høytørking skal du vita nøyaktig kva du gjer. Og korleis du gjer det. Me finn bonden som har lært seg handverket på søraustsida av Hardangerfjorden, fire kilometer sør for Rosendal. I den fem kilometer lange Omvikdalen grov isen i si tid ut ei flate som er særs eigna for landbruk. Her held Vegard Hjelmeland til. Han dyrkar gras på til saman 150 dekar. I staden for å konservere fôret i rundballar eller silo, har han investert i høytørke og –lager for til saman fire millionar kroner. Dei to bygningane på til saman 750 kvadratmeter heng i hop. Eine bygget rommar maskinpark, lager for ferdig bunta høy og teknisk utstyr til høytørka. I andre bygningen er tørkebingane og areal for pressing, pakking og mellomlagring.