– Heilt feil tidspunkt

Kven skal med: Er det ei utsetting av lausdriftskravet eller høve til modernisering som skal sikre mjølkekua på dei minste bruka eit langt liv?


Norsk Bonde- og Småbrukarlag varslar omkamp om lausdriftskravet. – Heilt feil tidspunkt. Utsetter vi lausdriftskravet kan vi gløyme ei investeringspakke, seier Anders Felde i Vestland Bondelag.


Liv Kristin Sola


Norsk Bonde- og Småbrukarlag, NBS, vil ha lausdriftskravet opp til ny vurdering. Dei fryktar massiv avvikling av mindre bruk og meiner overgang til lausdrift må skje i samband med nyinvesteringar, utan ein absolutt siste frist.


– Vi veit at mange båsfjøs er modne for utskifting, men lønsemda i næringa er for svak og rammevilkåra for dårlege, spesielt for dei små og mellomstore bruka, seier Kjersti Hoff, leiar av NBS.


Ho fryktar at mange no kjenner seg pressa til å avvikle eller til å ta store investeringar som det ikkje er økonomi til å forsvare.


– Det aller viktigaste er å styrke økonomien i mjølkenæringa, spesielt for dei minste bruka. I tillegg treng vi ei investeringspakke som monnar slik at alle som vil kan legge om til lausdrift, seier Hoff.

Opptrappingsplan

Lausdriftskravet vart vedteke i 2004, med frist i 2024. I 2016 vart fristen utsett til 2034. Seinare har det kome nye krav til båsfjøs frå 2024.