HØYR!

Det lenge varsla myrdyrkingsforbodet er vedteke. Naturomsyn vil få prioritet hjå Fylkesmannen når søknadar om dispensasjon skal vurderast.

Sjur Håland

 Frå 1. juni er det ikkje lenger lov å nydyrka myr.

–  Eg kan skjøna at dei bøndene som sit på større myrareal kjenner seg litt ille til mote i dag, seier landbruksdirektør Geir Skadberg hjå Fylkesmannen i Rogaland.

Fylkesmannen i Rogaland støtta framlegget til forbod i deira høyringssvar til Landbruks- og matdepartementet i 2017. Rogaland har kring éin million dekar landbruksareal. Halvparten av dette er beite. Kring 30.000 dekar er myr som teoretisk har potensial til å dyrkast. Ein liten del av totalarealet, understrekar Skadberg.

–  Fylkesmannen i Rogaland har gjennom lang tid vore opne på at ein del av myrarealet, særleg på Jæren, bør få ligga urørt uansett. Det handlar om å ta ansvar for mangfaldet og dei ulike funksjonane kulturlandskapet har. Dei argumenta trur eg bøndene ser, seier han.

–  Kva når forbod og restriksjonar rammar den enkelte bonden?

–  For henne eller han betyr det at det no har kome ei føreskrift som seier at ein i utgangspunktet ikkje skal dyrka myr med eit torvlag på minst 30 centimeter.

Det ligg likevel dispensasjonsmoglegheiter i føreskrifta. Kommunane kan mellom anna gjera vurderingar om dyrking av myr kan koma på tale som kompensasjon dersom bonden mister produksjonsareal grunna tap av leigejord eller ved utbygging i offentleg regi.

Skadberg held fram at Naturmangfaldlova har lege til grunn for vurdering av løyve til nydyrking i mange år. Lova seier at kommunen skal senda søknadar som omhandlar vesentlege miljøverdiar til Fylkesmannen for uttale.

–  Då er det snakk om individuelle vurderingar, men det ligg i sakens natur at det ikkje følgjer med ein automatisk rett til å dyrka myr, sjølv om ein ikkje har andre alternativ.

–  Er de ikkje for strenge? Ser ikkje fylkesmannen bøndene sine behov?

–  Eg meiner ikkje me er for strenge. Det kan ha vore litt ulik praksis rundt om i kommunane, men fylkesmannen si plikt til å sjå at omsynet til natur- og kulturlandskapsverdiane, saman med klimaomsynet, blir ivareteke.

–  Kva med dispensasjon til å dyrka myra for å oppretthalda landbruksproduksjonen, slik føreskriftsendringa opnar for, ved ei eventuelt endring av gjødselvareføreskrifta?

–  Inngangen er at Landbruks- og matdepartementet opnar for moglegheiter for å søkja dispensasjonar utan at det ligg ein rett til å få dispensasjon. Skadberg er oppteken av å få til så lik praksis som råd når søknadane om dispensasjon kjem til kommunane.

–  No skal me setja oss grundig inn i dei nye endringane og samla folk frå landbrukskontora rundt om i fylket og diskutera praksisen grundig.