Stø kurs, men ikkje millimeterpresisjon

Fleksibelt og enkelt rundt kalving: Når kua har kalva kan dei enkelt fjerne stokkane, hente ut kalven gjennom fronten og mjølke kua.


I mange år var målet å bygge fjøs. Etter snart to år i nytt robotfjøs styrar dei mot stabil drift og god økonomi. – Me skundar oss langsamt, seier Sveinung Haaland.


Liv Kristin Sola
Dei er gardsfolk i generasjonar. Jorunn med odel på Efjestad på Vigrestad, Sveinung på Tjemsland Nordre på Varhaug. No driv dei garden Hårr heilt sør på Jæren, der Nordsjøhavet rullar inn frå alle kantar.


– Stig havet godt ti meter, bur me på øya Hårr, seier Sveinung.


Sveinung si oldemor vaks opp på Hårr, men garden vart selt ut av slekta. At farmora seinare tok garden på odel vart avgjerande for Sveinung si framtid. Han skulle bli bonde, men jorda på heimegarden vart slukt av bustadutvikling.

Ung bonde

Sveinung var dreng hjå farmora det første året, før han overtok bruket i 1999, 23 år gammal. Han overtok 115 tonn i mjølkekvote og 188 dekar dyrka jord. Dei hadde slaktegris og Sveinung tok med seg saueflokken sin då han flytte sørover til Hårr. Langsiktig mål var å utvikle garden til ei moderne drift som han kunne leve av også i framtida.