Mønstringskveld for store og små cowboyar

Gjensidig begeistring.
Aslak Pollestad var på heimebane denne kvelden. Han og familien hadde opna garden for alle som ville koma.
På mønstringskvelden vert det vist korleis ein mønstrer både ku og kalv. Eit tips kan vera å finna ei ku som ikkje gir deg for store utfordringar.... Det var Marie Brådli som fekk erfara (u)viljen til denne kua.
Aktivitetar for alle, gratis og utan noko særleg kø. Presisjonskast av "erteposar" var ein godt besøkt aktivitet.
Søsken kan vel hjelpa kvarandre med å koma seg framover, på ein traktor som hadde spesielt dårleg framdrift.
Margit Nærland likte seg best i lag med kalvane.
Litt for lange føter på ein litt for liten sykkel, hindrar ikkje Johan i å prøvekøyra ein tur på fôrbrettet.
Det kunne bli mange rundar på traktoren for dei aller ivrigaste.
Hoppe i halmen eller køyra traktor langs fôrbrettet. Det var berre å velja.
Torgeir Erfjord frå Nortura sørgja for varm og god mat rett frå grillen.
Treffa kollegaer, den gode drøsen over kaffikoppen, er ein motivasjon i seg sjølv til å koma seg til å samlast.
For dei som ville oppleva å mjølka, vart dette eit alternativ. Det var berre å finna rett teknikk.
Små og store fekk prøva seg på eksteriørbedømming av to kyr.
Skal ein til topps i denne harde konkurransen, måtte det full konsentrasjon til. Mange vaksne brukte tid og kunnskap, og vurderte dei to kyrne etter beste evne.
Men det vart 12 år gamle Mikkel Skretting som tok innersvingen på dei erfarne bøndene, og vann ein suveren seier i eksteriørbedømminga.
Fine og nyttige premiar til vinnarar og hjelparar.
Etter ein lang kveld i ringen vart kalvane leia attende til hyttene sine.
Bonden sjølv, Asgeir Pollestad, fekk ein takk for å ha stilt garden til disposisjon. Annelin Helland hadde perla ei fargerik ku, som bonden fekk som ein bonus.

Kalvemønstring, eksteriørbedømming, traktorkøyring og ikkje minst god mat frå grillen og den gode drøsen.

Liv Kristin Sola

Det mangla ikkje på aktivitetstilbod då Jæren Young Cowboys inviterte til mønstringskveld. Familien Pollestad stilde garden og dyra til disposisjon, på Nærbø på Jæren.

– Me håper å motivera folk til å mønstra kalv og ku på Jærmessa i slutten av august, seier Lene Iren Rangen, styremedlem i Jæren Young Cowboys.

God stemning. Aktivitetar for alle. Ingen kø. Gratis mat frå Nortura, ferdig servert frå grillen. Jæren Young Cowboys inviterte til open gard og mønstringskveld, fredag 20. mai. Det var fri flyt av trøtraktorar på fôrbrettet, kyr som gjerne ville helsa på, mønstring både av ku og kalv, konkurranse i eksteriørbedømming av to kyr.

– Mønstringskvelden er eit årleg arrangement som me i Jæren Young Cowboys inviterer til i lag med vertsbonden. Målet er å motivera både barn og vaksne til å mønstra ku og kalv på Jærmessa som er siste helga i august, seier Lene Iren Rangen.

Familien Pollestad, Ester og Asgeir, Serina, Aslak og Pauline opna fjøset, kosta fôrbrettet og rydda plass under halvtaket for å gjera sitt for at kvelden skulle vera triveleg for alle som kom.

Del på Facebook

Stikkord denne saka: åpen gard, Storfe, ung i bygda